Zubizarreta, Patxi
Patxi Zubizarreta (Ordizia, 1964)
Gipuzkoan jaio zen, baina Araban bizi da, Gasteizen. Ikusten baldin baduzue, igoal ez zaituzte ikusiko, ze askotan zerura begira joaten da, zikoinak ikusteko. Zikoinak oso bidaiazaleak dira, eta urtean behin Afrikaraino egiten dute hegan. Patxi ere bidaiazalea da, eta Afrikazalea. Txokolatezalea ere bada, eta txokolatea –beltz, garratz, azukre gutxikoa– kasik liburuak bezainbeste gustatzen zaio.
Euskal Filologia ikasketak Gasteizen amaitu zituen eta bertan bizi da harrezkero. Haur eta gazte literaturan hainbat lan argitaratu ditu (Usoa, Gutun harrigarri bat, Gizon izandako mutila…), hainbat sari jaso. Helduen literaturan (Jeans-ak hozkailuan, Barrikadak…) eta itzulpengintzan (Ali Baba eta berrogei lapurrak, Mirarien kalezuloa, Printze Txikia ...) ere jardun da.
