Elosegi, Migel Mari
Migel Mari Elosegi Irurtia (Leitza, 1970)
Biologia ikasketak Leioan egin zituen, eta baso-teknikariarenak Atarrabian eta Murgian. Ikasketak bukatu ondoren ingurumeneko hezitzaile lanetan jardun zuen eta 1998az geroztik basozaina da. Gaur egun Leitza eta Goizueta aldeko mendietan aritzen da. Hauxe du bere lehen saiakera. Aurretik beste hainbat idazlan argitaratu ditu, batez ere artikuluak, Elhuyar aldizkarian, Egunkarian, Zazpikan, edota Argian, Euskal Herriko faunaren inguruan. 2000. urtean «Piztizaleon urtekaria» izeneko liburuxka argitaratu zuen Elhuyarrekin eta urtean zehar animaliek dituzten gorabeherak azaltzen ditu bertan. Horrez gainera, hizlari eta irrati-kolaboratzaile gisa ere jardun izan du. Azken urteotan Pirinioetako faunak erakarri du bereziki Migel Mariren arreta, baina oso bestelako gaiak ere jorratu ditu. Antzerkia, dantza, musika eta bertsolaritza ere gustukoak ditu oso.
