Zelaieta, Edu

Edu Zelaieta Anta (Gasteiz, 1973)

Euskal Filologia ikasi ondoan, Euskaltzaindiak argitaratutako Baztan-Bidasoako hizkeren azterketa dialektologikoa tesiarekin doktoratu zen 2006an. Lanbidez, irakasle jardun du bereziki (euskaltegian, ikastolan eta unibertsitatean), ostalaritzako urteak gogoan baditu ere. Gaur egunean, EHUko Gasteizko Hezkuntza eta Kirol Fakultatean ari da lanean.

Hiru poema-liburu emanak ditu argitara aurretik: Jendakiak urruneko familiatan (2002), Mugaldekoak (2004) eta Aldaira urdinak (2010). Bigarren liburutik jalgi zen Mugaldekoak taldea, eta bi disko publikatu ditu orain arte literaturaren eta musikaren arteko uztardura baliatuta: Biziago sentitzeak dakarren muga inguruan (2006) eta Begiak lekuko (2012). Mugaldekoen trilogia osatuko duen hirugarren lana bidean da.

2002az geroztik, kolaboratzaile ari(tu) da hainbat komunikabidetan: Euskaldunon Egunkarian, Argian, Arabako Hitzan, Alean edota Hala Bedi irratian.

Musikariek inbidia handia ematen diote, baina hori biluz ezin daitekeen ispilua da.