Bilbao, Jon

Jon Bilbao Azkarreta (Cayey, Puerto Rico, 1914 - Gorliz, Bizkaia, 1994)

Gaztetan dantzaria eta gitarrista, gerora historialaria, irakaslea, ikertzailea eta bibliografoa.

36ko Gerran, Eusko Gudarostean izena eman eta boluntario joan zen frontera. Gerra ostean, erbesteratuta, Columbiako Unibertsitatean (New York) amaitu zituen Madrilen hasitako Historia ikasketak. New Yorken bertan, La revista belga, Ambos Mundos eta Basques aldizkarietan jardun zuen, Agirre lehendakariak eskatuta.

Irakasle ere aritu zen Estatu Batuetako hainbat unibertsitatetan. 1967an, Nevadako Unibertsitate Sistemako Euskal Ikasketen Zentroaren sortzaileetako bat izan zen William A. Douglass eta Robert Laxaltekin batera.

Euskal Herrian bizi izan zen aldietan, Jose Migel Barandiaranekin kolaboratu zuen Eusko-Jakintza, RIEV eta Ikuska aldizkarietan.

Abertzale kosmopolita, Kuban ere bizi izan zen, eta ordukoa da Vascos en Cuba: 1492-1511 (1958).

Bere lan nagusia, hala ere, gazte garaian hasi eta inoiz utzi ez zuena, Eusko Bibliographia izan zen: euskal gaiari buruz argitaratutako liburu, liburuxka, artikulu eta abar jasotzen dituen obra monumentala.