Douglass, William A.
William Anthony Douglass (Reno, Nevada, 1939)
Antropologoa, ikertzailea, Renoko Unibertsitateko Euskal Ikasketen Programako bultzatzailea, bai eta hango zuzendari ere 30 urte baino gehiagoan, 1999ko azken egunean erretiratu zen arte. Bizi osoan zehar ikertu ditu talde etnikoak, nortasuna, emigrazioa, genealogia eta abar Europan (Italia eta Euskal Herria), Australian eta Mendebaldeko Estatu Batuetan.
Argitaratutako bere lanen artean daude Death in Murelaga (1969), Amerikanuak, Basques in the New World (1975) –Jon Bilbaorekin batera–, Echalar y Murélaga: oportunidad y éxodo rural en dos aldeas vascas (1977), Beltran: Basque Sheepman of the American West (1979), Emigration in a South Italian Town: An Anthropological History (1984), From Italy to Ingham: Italians in North Queensland (1995), Azúcar amargo. Vida y fortuna de los cortadores de caña italianos y vascos en la Australia tropical (1996), Global Vasconia: Essays on the Basque Diaspora (2007), Basque Culture: Anthropological Perspectives (2007) edo Terrorista nire baitan (Pamiela, 2011).
Beste gai batzuetako argitalpenak ere baditu: Terror and Taboo. The Follies, Fables and Faces of Terrorism (1996) –Joseba Zulaikarekin batera–, Tap Dancing on Ice: The Life and Times of a Nevada Gaming Pioneer (1996) –bere aitaren biografia–, edo Casting about in the Reel World: Fishing on the Fly (2002), abiapuntua arrantzan duena. Biografia bat dauka gaztelaniaz, Miel A. Elustondok idatzitakoa: William A. Douglass, Mr. Basque (Pamiela, 2011).
Hainbat sari jaso ditu: Nevadako Unibertsitatean, UPNA-NUPen (urrezko domina) eta UPV-EHUn (honoris causa doktorea). 1998tik hona, ohorezko euskaltzaina da. Eusko Jaurlaritzako Lagun Onari saria eskuratu du Euskal Herriaren alde eginiko lanarengatik, bai eta Renoko Unibertsitateko bi sari nagusiak ere: Outstanding Researcher of the Year eta Distinguished Faculty Member. 2005ean, The Nature Conservancy erakunde ekologistak Lifetime Achievement Award saria eman zion bizi osoan zehar ingurumena zaintzeagatik. 2012tik hona, bere izena agertzen da Nevada Writers' Hall of Fame delakoan, Nevadako idazlerik ospetsuenen artean.
