Axular

Pedro Agerre Azpilkueta, Axular

Urdazubin jaio zen XVI. mendearen azken erdialdean. Salamancan ikasi eta Teologiako Batxilergoa eskuratu ondoren, apaiztu egin zen (1596). Lau urteren buruan (1600ean) Sarako eliza nagusiko erretore zegoen, hartaz jabetzeko antze bereziak erabili behar izan bazituen ere.
1644ko apirilaren 8an hil zen Saran.
Oro har, predikari gisa erakutsi maisutasunari zor dizkio Axularrek garaiko lapurtarren artean izandako arrakasta eta ospea. Halaber, ingurukoengan eta hainbat euskal idazlerengan izandako eragina biziki areagoturik suertatu zen Gero liburuaren (Bordele, 1643) bitartez Axularri euskal literaturaren esparruan mendeetan barrena iraungo zuen aitzindaritza iritsi zitzaionean.
Haren idaztankerak irakurlearengan sortu ohi duen liluraren erroek behialako predikariaren aho-hitzen taxuketa eder-neurtua dute gako nagusi.