Munstro bihozbera bat lagun moduan hartzen duen neskatila baten istorioa kontatzen du Mikel eta Maite Gurrutxagaren ipuinak
DV | DONOSTIA. 2010-09-24
Alex, nire laguna album ilustratua aurkeztu zuten atzo Iruñean Euskararen Nafar Institutuak eta euskararen arloko zenbait udal zerbitzuk. Mikel Gurrutxagak idatzi eta Maite Gurrutxaga arrebak ilustraturiko ipuin hori izan zen iaz Etxepare saria irabazi zuena.
Pamiela argitaletxeak kaleratu du lana eta 14 euroren truke eros daiteke. Sei bat urteko haurrentzat dago gomendatua.
Ipuinak Ixabelen istorioa kontatzen du. Neskatoak munstro bat hartzen du lagun -munstro bihozbera-. Ametsezko laguna da eta berarekin batera bakardade uneei aurre egiten die eta sentimenduak berari agertzen dizkio. Baina lagun mutu horren agerpenak gutxitu egingo dira Ixabelek adiskide berriak egiten dituen neurrian.
Epaimahaia Miren Agur Meabe eta Patxi Zubizarreta idazleek eta Aitziber Alonso eta Mikel Valverde irudigileek osatu dute. Epaimahaikideek azpimarratu zutenez, lan honek «xarma berezia du, testuaren eta irudiaren artean egiten duen bat-egite zoragarriari esker». Horrez gain, lan honen «kalitate estetikoa, hizkera poetikoa eta irudien ikuspegi zinematografiko» nabarmendu dute.
Mikel Gurrutxaga (Amezketa, 1972) zenbait kontakizun laburren egilea da, haurrentzat zein helduentzat. Maite Gurrutxagak (Amezketa 1983) Arte Ederrak ikasi zituen Leioan eta Bartzelonan, eta Ilustrazioa Bartzelonako Escola Donna izenekoan.
Etxepare sariak 2004. urtean sortu zituzten Nafarroako euskararen arloko zenbait udal zerbitzuk, Foru Komunitatean euskal literaturaren esparruan erreferentziako saria izan zitezen. Lehenengo bi edizioetan (2004 eta 2005), saria haurrei zein helduei zuzendutako narrazioek jaso zuten. 2006an, haurrentzako albumak sortzeko beka bihurtu zen.
