«Poesiara joateko modu bakarra, orain, 2012an, prosa da», adierazi du idazleak.
Bernardo Atxagak eta Jabier Muguruzak Paradisua eta katuak publikatu dute, bi material mota dakartzana: liburua eta DVDa. Bertan, Donostiako Victoria Eugeniako Club aretoan aurtengo irailaren 3an jendaurrean egindako irakurketa ikusi eta entzun daiteke.
Oso pieza desberdinekin osatutako testua da Paradisua eta katuak. Badaude ipuinak, poemak, pasarte komikoak eta gogoetak. Gainera, esan liteke poesiari buruzko hausnarketa baten ondorioa ere badela. Atzoko aurkezpenean honela mintzatu zen Atxaga: «Niretzat, kezkarik handiena poesia da. Eta horri ematen diot garrantzi gehien. Betiko kezka da, aspaldikoa. Urte asko dira 'Etiopia' atera nuela, eta 'Henry Bengoa Inventanium' ematen hasi ginela ere badira hogeita bost urte. Kezka hauxe daukat: nola egin gaur egun poesia. Oraindik ez dut auzia erabat konpondu, baina bidean gauza batzuk aurkitu ditut, eta 'Paradisua eta katuak' honetan poesia egiteko saio bat dago, besteak beste».
Felix Ibargutxi Diario Vasco egunkarian
