Luku, Antton

luku_a9

Antton Luku Hargindegi (Kalifornia, 1959)

Haurtzaroan, familia Ameriketatik itzuli eta, Amikuzeko Arberatzen bizitua. Irakaskuntza ikasketak bururatzean Garazira joanik errient, oraino ere hango lizeoan ari da euskara irakasle gisa.

Zenbait artikuluz gain Maiatz aldizkarian, ipuin bilduma bat argitaratua du, Botoiletan (Maiatz, 1998).

Antzerkia izaki bere sorkuntza eremu nagusi eta joriena, saiatu da Hiru Punttu taldearekin herri kultur eretan oinarrituz, haiek egokituz, herri antzerkia solasean ezartzen egungo arazoekin eta estetika garaikidearekin; euskal antzerkiarentzat bide berri eta egokituak bilatzen. Bere azken lau lanak toberari buruzko ikerketak ere badira. Bestalde, bereziki antzerki tailerrak lantzen ditu, gazte antzerkia erronka handiena baitzaio, orain lehen bezala, sorkuntza libertate- eta libertitze-espazio funtsezkoa delako.

Ildo horretakoa da Euskal Kultura? saiakera, Juan Zelaia Saria 2008 (Pamiela, 2009), Fauxto karrusaren karietara idatzia, oinarri teoriko gisa.

Libertitzeaz (Pamiela, 2014), berriz, haren background gisa ikus daiteke, etorkiko artedramaren analisia eta honi buruzko hausnarketa ere badelarik, gutxien ustean atzoko formek biharkoetan eragin baitezakete.

Azkenik, 39 idazle nafar (Pamiela, 2017) liburuaren partaide bat izan da.