Errealitatea eta fantasia uztartzen ditu haurrei zuzendutako lanak
Pamielak eta hainbat toki entitatek antolatutako VI. Etxepare sariaren irabazlea da Asiain
Miren Mindegia. Diario de Noticias (2012-11-9)
Pamiela argitaletxeak VI. Etxepare Sariaren irabazi zuen Miren Asiainen (Iruñea, 1986) Hara! lana argitaratu berri du, 1000 aleko tiradarekin. Argitaletxeak berak Nafarroko Udal eta hainbat toki entitateko Euskara Zerbitzuekin batera antolatzen duen sariketan, Asiainen lana beste 16ren artean hautatua izan zen.
Arte Ederretan lizentziaduna den Asiainek aurkeztutako lana "magiaz beteriko kontakizuna" da, non protagonista haur bat den. Neskatoak, amonarekin batera, etxerako bideari ekiten dio: egunerokoan ohikoa den egoera honetatik abiatuta, egileak fantasiara salto egiten du. Asiainek berak, pertsonaia arrunten bidez "egunerokotasunean sor-tzen diren une magikoez" hitz egin nahi izan duela azpimarratu zuen atzokoan. Edozeini gerta lekioken "erantzunik gabeko bitxikeri" horiek islatzen ditu idazleak bere lanean.
Teknikari dagokionez, Asiainek sormen bide desberdinak uztartu ditu, eskulanak zein irudi digitalak bateratuz, collagearen bidez: "Ordenagailua, harkatzak, akuarela eta bidetik aurkitu ditudan material asko erabili ditut".
MURRIZKETAK MINTZAGAI Atzo ospatutako aurkezpenean, Pamielako Pello Elzaburuk murrizketen eragina izan zuen mintzagai, izan ere Nafarroako Gobernuak ez du aurtengo sariketan parte hartu. "Garai honetan eta krisialditik ateratzeko inbertsio estrategikoak behar dira, eta kultura bada, industria, lana eta sormenaren aldetik, inbertsio estrategikoak", aldarrikatu zuen . Elzaburuk toki entitateen laguntza eskertu zuen sariketa antolatzerakoan, izan ere, "garai zail hauetan, horrelako gauzetan sortzen da egoerari aurre egiteko modua".
Beste aldetik, editoreak sariketa honek "euskal kulturan gune propio bat" sortzen duela adierazi zuen, "kanpotik datorrenari uko egin gabe". Etxepare sariketa haur eta gazte literaturako irudigintzan dagoen sari bakarra dela gogoratu zuen Elzaburuk: "Estrategikoki horrelako ekimenak bultzatzea ezinbestekoa da gure autonomia mantendu nahi badugu: gurea sortu eta kanpora eraman".
2013 ETXEPARE SARIA Datorren urteari begira, Etxepare Sariaren VII. edizioaren oinarriak 2013ko urtarrilaren 2an argitaratuko direla adierazi zen atzoko agerraldian. Sari honetara haurrei zuzenduriko lan ilustratuak aurkeztu ahal izanen dira, bakarka edota idazle eta ilustratzaileek osatutako taldeetan. Lanak, halaber, euskaraz idatziak izan beharko dira, jatorrizkoak eta argitaratu gabeak. Ildo horretatik, ez dira moldatutako lanik edota aurretik saririk jaso duen lanik onartuko.
Formatuari dagokionez, 20x21cm baino handiagoak izan beharko dute, eta gutxienez 15 orrialde bikoitz izanen dituzte. Testuek ez dituzte 4.000 karaktere baino gehiago edukiko. Guztira sei ale aurkeztu beharko dira (bat jatorrizkoa eta besteak pdf formatuko kopiak). Originalak aurkezteko epea 2013ko maia-tzaren 31n itxiko da eta epaimahaiak ekainaren 29an hartuko du erabakia.Literatura sari esanguratsu baten hutsunea zegoela ikusirik, 2004ean antolatu zen lehenengo aldiz Etxepare sariketa, haur, gazte eta helduentzako lanak saritzeko helburuarekin. 2006tik 2009ra bitartean haurrentzako albumak sortzeko bekan bilakatu zen arren, azken urte hartatik aurrera sari bezala finkatu da, egun arte.
Aurtengo edizioaren antolatzaileak Barañaingo Udala, Baztango Udala, Berriobeitiko Udala, Berriozarko Udala, Bortzirietako Euskara Mankomunitatea, Burlatako Udala, Garesko Udala, Nafarroako Iparraldeko Euskara Mankomunitatea, Lizarrako Udala, Malerrekako Mankomunitatea, Sakanako Mankomunitatea, Uharteko Udala, Zaraitzu eta Erronkariko Batzorde Nagusiak eta Zizur Nagusiko Udalaren kultur patronatua izan dira.
