Chiara printzesa veneziarraren abenturak jasotzen ditu gazteentzako zuzendutako eleberriak

Noticias de Gipuzkoa. J. Imaz - (2010-6-18)
"Gai serioetan" eta beretzat "hunkigarriak" zirenetan topatu du azken urteotan inspirazioa Xabier Mendiguren idazle beasaindarrak. Aitortu zuenez, baina, hurrunagoko munduetara bidai literarioa egiteko gogoa sortu zitzaion halako batean. Erabaki horren ondorioa da atzo Donostian aurkeztu zuen 1.002. gaua eleberria, gazte literaturan kokatu daitekeen abentura liburua.
Tokialdatze horretan, Mediterraneo ekialdean kokatu du Mendigurenek kontakizunaren korapiloa. Chiara printzesa Dalmaziako printzearekin ezkontzera behartuko du bere aitak, Veneziako dukeak. Abiapuntu hori izango du emakume ameslari eta ausartaren abenturak, Mendigurenek argitu zuenez. Hortik aurrera, Mediterraneoko beste zenbait gune eta hiritara bideratuko da narrazioa.
"Chiara heroina bat da?", galde egin zioten kazetariek Mendigureni, aurkezpenean zehar. "Bai. Protagonista da, bere patuari aurre egiten diolako eta edertasunaren zentzua duelako", erantzun zuen autoreak. Gaineratu zuenez, liburuan agertzen diren "hainbat elementu" abenturazko generoaren "klasikoetan" agertzen dira. Horien artean aipatu zituen "amodioa, gutun bidezko maitasuna, bahiketa, piraten abordajea eta ihesa".
Liburuak Iñaki Martiarena Mattin ilustratzailearen marrazkiak ere jasotzen ditu. Pamielako arduradunen esanetan, klasikoen "estilo dotorez" eta "gaurko erritmo azkarrez" osatutako lana burutu du Mendigurenek.