Siete poetas vascos liburuaren hitzaurrean, Jose Angel Irigarayk euskal literatuaren errepaso orokorra egiten du irakurlea obraren aurrean kokatzeko. Izan ere Buenos Aireseko Liburu Azokari begira egituratu zuten, hainbat poeten lana biltzeko asmoa lehendik bazuten ere. Argentinako Liburu Azokan liburua aurkezteko parada izan zuten, euskal etxeen eta Juan de Garay zentroaren babesaren bitartez. Milioi eta erdi lagun gerturatzen dira urtero azoka horretara, kaleetan uneoro bigarren eskuko liburu eta liburu denda zoragarriak badaude ere.
Jose Angel Irigarayk itzulpengintzaren balioa nabarmendu zuen atzo askoz apalagoa den Bilboko Liburu Azokan. Modu horretara, publiko zabal batera heltzearen beharra azpimarratu zuen gero eta mundu lehiakor eta globalago honetan. Hala, liburuaren bitartez pedagogia edo euskal poesiaren ibilbide orokorra egitearen beharra argudiatu zuen.
Egile aukeratuek (Luigi Anselmi, Bernardo Atxaga, Jon Gerediaga, Tere Irastortza, Xabier Lete, Xabier Montoia eta Joseba Sarrionandia) lotura estua dute argitaletxe nafarrarekin. "Gure garaiko lirikaren berri emateko urratsa izan da eta etorkizunean ere bide horri eusteko asmoa dugu", argitu zuen Irigarayk. Ez dok amairu taldeko eta Jorge Oteizak sortu zuen Euskal Arte Garaikidearen eskolako kidea izan da. Urdinkara lanarekin Letren Espainiako Sariaren finalista ere izan zen 1995ean. Horrez gain, Bilboko Kafe Antzokiaren eta Zenbat Gara elkartearen bultzatzailea ere bada.
Ez da euskal poesiaren antologia kaleratzen duten lehen aldia: Jon Kortazarrek Reduccions poesia aldizkari katalanean argitaratu zuen 1984. urten; Ingalaterran ere Mari Jose Olaziregik bultzatu zuen Six Basque Poets lana... Bide horien bitartez, euskal poeta eta idazleen lana atzerrian are eta ezagunagoa egin daitekeela uste dute.
Egileek eurek ere parte hartu dute egitasmo honetan, eta bakoitzak sei lan aukeratu ditu. Gainera, olerkiak itzuli eta gainbegiratu ere egin dituzte. Poemen amaieran, sei egile horien inguruko eranskinean bakoitzaren ibilbidearen berri ematen dute.
Deia - Siete poetas vascos
