Heriotzarekin aurrez aurre

Xabier Letek eskarmentu luze-zabala dauka poesian. Egunsentiaren esku izoztuak kaleratu aurretik, beste sei poesia liburu plazaratu ditu azken 40 urteetan: Egunetik-egunera orduen gurpillean (1968), Bigarren poema liburua (1974), Urrats desbideratuak (1981), Biziaren ikurrak (1992), Zentzu antzaldatuen poemategia (1992) eta Abestitzak eta poema kantatuak (2006). Bizitzaren oinarrizko gaiei buruz aritu da Lete liburu sarituan: maitasuna, adiskidetasuna, aberria, haustura, edertasuna… Dena den, heriotzak eta absentziak berezko lekua dute Leteren poemetan. Espainiako Literatur Kritikaren Sariaren epaimahaiak nabarmendu du «Letek begirada estatikoarekin» egiten diola so heriotzari, «aurrez aurre begiratzen dio».

«Ez dakit poema onak edo txarrak idatzi ditudan. Baina badakit neure barruko egia agertu dudala, egiatia izan naizela, eta hor ez dagoela betelanik, ez dagoela txorakeriarik. Horretaz ziur sentitzen naiz», esan zuen Xabier Letek BERRIAri urtarrilean emandako elkarrizketan.

http://www.berria.info/paperekoa/plaza/2009-04-19/038/007/Espainiako_Kritikaren_Sariak_Uribe_eta_Leterentzat.htm