Euskalherriko liburuak Buenos Aireseko Liburu Azokan
Buenos Airesekoa da Hego-Ameriketako liburu azokarik handi eta garrantzizkoena. Aurten 35. edizioa da, eta apirilaren 23tik maiatzaren 11a arte ospatuko da. Bertan bildu ohi dira idazle, editore, zabaltzaile, hezitzaile, liburuzain, zientzilari eta milioi bat baino gehiago irakurle eta jende. Liburu eta kultur munduan zinezko gertakaria da. Pamiela argitaletxea gonbidatua izan da erdarara isuriak izan diren bi liburu aurkeztera:
- Vascos. Su lengua a través de la historia, Juan Carlos Etxegoien, Xamar idazlearen Euskara Jendea liburuaren erdarazko bertsioa (Udalbide erakundearen laguntzarekin argitaratua). Hemen eta kanpoan euskararen historian barnako bidea eta beste hainbat berri interesgarri jakin nahi duenarentzat, orain erdaraz emanik dela, liburu ezinago aproposa. Xamar eskarmentuko idazlea da halako ibilbideetan, bere Orhipean ezaguna gehien zabaldu diren liburuetarik baita, lau hizkuntzetara isuria (orijinalean euskaraz, eta espaineraz, frantsesez eta ingelesez); aurreikusita dago jada hurrengoa: katalanez. Baitezpadako berme bat, beraz.
- Siete poetas vascos (Luigi Anselmi, Bernardo Atxaga, Jon Gerediaga, Tere Irastortza, Xabier Lete, Xabier Montoia eta Joseba Sarrionandia). Seina poema (euskarazko orijinalarekin) eta Joxemiel Bidadorrek idatzitako soslai biografiko-literario mamitsuekin. Jose Angel Irigarayk koordinatutako edizioa da, sar-hitza ere bere kargu duelarik. Argentinan aurkezteak garrantzi berezia dauka, bertan euskal jatorriko jende kopurua oso handia delako eta, gainera, Liburu Azoka entzutetsuan egitearekin, oihartzun berezia lortu dezakeelako, den tokian dela, espainerazko letren merkatu zabalean. Euskalherrian ere aurkeztuko da, noski.
Hori dela-ta, bertan izanen dira Xamar eta Jose Angel Irigaray aipatutako liburuak aurkezten eta horien inguruko ekitaldietan: hitzaldi, errezitaldi eta beste. Aurkezpen ofizialak Liburu Azokan bertan eginen dira Fundación Vasco Argentina Juan de Garay eta FEVA (Federación de Entidades Vasco Argentinas) elkarteen standean (2418-2420 zenbakiak) apirilaren 26an. Antzeko ekitaldiak antolatu dira, FEVA beraren eskutik, beste zenbait tokitan: Buenos Aireseko Euskaltzaleak elkartean (apirilaren 25ean), Montevideon (27, bonbardaketaren urteurrenaren karira Plaza bat eskainiko zaio Gernikari eta bertan ere izanen dira partaide; 28an aurkezpen-hitzaldia), Bahia Blancan (29/30ean) eta Rosarion (maiatzaren 1/2an).
Egitarau horri erantsi behar zaio Ruper Ordorikaren partaidetza berezia, kantariak ere parte hartuko baitu zenbait ekitalditan, Dani Pérez musikari argentinarrak lagundurik. Bere gaineko emanaldiak eskainiko ditu Buenos Aireseko "Centro Cultural San Telmo"n Euskaltzaleak elkartearen eskutik (apirilaren 23an), liburu Azokan (apirilaren 24ean) eta Montevideoko Zitarrosa deitu areto prestijiotsuan (apirilaren 27an); eta Bahía Blanca eta Rosarion ere parte hartuko du aipatutako ekitaldietan.
Kultur egitarau hau antolatzeko garaian baitezpadakoa izan da FEVA Elkartearekiko elkar-lana. Eta uste izatekoa da bere xumean garrantzizko urratsa dela, baita merezi duen oihartzuna ere bilduko duela Buenos Aireseko Liburu Azokan, baita inguruko beste tokietan eginen diren ekitaldietan ere.
