Azkona, Josetxo

azkona_josetxo

Josetxo Azkona Garzia (Iruñea, 1953)

Irrati, aldizkari eta prentsan ibilitakoa da. Korrok aldizkariaren sortzaileetako bat izaki, bertan eman zituen lehen urratsak literaturaren alorrean. Iruñeko Euskalerria irratiko ohiko kolaboratzailea da.

Iruñeko Udalak antolaturik, Olerki Sariketaren lehen sariaz jabetu zen Argiaren goraldian zabuka lanagatik, 1993an. Era berean, Euskaldunon Egunkariaren Nafarkaria gehigarrian parte hartu zuen 1991tik 2002ra arte. Zutabe batengatik, hain xuxen, IX. Rikardo Arregi saria eman zioten baloraziozko kazetaritza atalean, 1997an. Euskaltzaindiak antolatutako  Felipe Arrese Beitia Saria bere egin zuen Artius poesia obragatik, 1995ean.

Horrez gain, ondoko liburuen egilea ere bada:
- Koilara bete hitz (Alberdania, 2001, poesia).
- Patata soro bat (Alberdania, 2004, narrazio laburrak).
- Arbola naiz, eta zuhaitza (Alberdania, 2009, poesia).
- Ez naiz Fujin izan (Pamiela, 2010, poesia: 318 haikuz osaturiko bilduma).
- Galdeak eta baleak (Pamiela, 2014, poesia).
- 39 idazle nafar (Pamiela, 2017) liburuaren partaide bat da.

Jendaurreko poesia emanaldi franko eginak ditu, eta urte anitz daramatza Baxe Nafarroako Hatsa poesia-liburuko kolaboratzaile gisa. Musikari batzuekin elkarlanean aritu da, eta kantari batzuek kantura eraman dituzte haren poemak. Hainbat lanetan jardun eta gero, itzultzailea da lanbidez, gaur egun.