Taberna, Mikel

Mikel Taberna (Alkaiaga-Bera, 1957)

Arte Ederretan lizentziatua. Taldeko nahiz bakarkako erakusketetan parte hartu du eskultura, grabatu eta margolanak aurkeztuz. Diskoen azalak egin ditu; Joseba Irazokiren Irri eta solas, Gizona zakur egin zen, Do-ren Tokitik kanpo eta Tokian tokiko, eta Mugaldekoak-en azken diskoa dira honen adibide. Musika eta irudia nahastuz, improbisazioan oinarritutako IGLU proiektuan dabil Joseba Irazokirekin batera.

Asier Gogortza eta Jordi Llorellaren zuzendaritzapean Ararat. El mito del diluvio filmean parte hartu du.

Zenbait urtez jende helduarentzat euskara irakasle aritu ondotik, gaur egun Nafarroako Gobernuan itzultzaile lanetan ari da.

Euskarazko hainbat komunikabidetan (Ttipi Ttapa, Egunkaria, Xorroxin, Euskalerria Irratia, Nabarra…) kolaborazioak eginak ditu eta Korrok literatur aldizkariaren talde eragileko kide izan zen.

Argitaratutako liburuak:
- Mendearen ilunabarrean, poema bilduma (1996, Arabako Foru Aldundia).
- Errege eguneko panpina, ipuina (2000, Kutxa).
- Txokolatezko dinamita, ipuin bilduma (2001, Susa).
- 39 idazle nafar (Pamiela, 2017) liburuan parte hartu du.