Miren Eraso, donostiar arte historiagile eta dokumentu kudeatzailea hil berri da Oiartzungo bere etxean (2009-12-17).Arte munduan aritua eta aditua, batez ere Donostiako Arteleku zentroan: 1990 urteaz geroztik dokumentazio saileko arduradun, 1995tik aurrera Zehar aldizkariko zuzendari, 2007an, azkenik, Artelekuko zuzendari 2008a arte. Azken urte honetan lanean zebilen Gasteizko Montehermoso kulturgunearen Mediateca sailean eta VIVA arteari buruzko edizio ekimenean (bertan, besteak beste, Erlea aldizkariarekiko elkar-laneko aukera aurreikusten zuen).
Bost urtez (2002-2006) Kulturaren aldeko Euskal Fundazioaren babesarekin Pamielak antolatzen duen Juan Zelaia saiakera sariko epaimahaikoa izan zen. Pamielakoengan utzitako oroitzapena beterik dago, adiskidetasunez gain, haren sentsiberatasun eta pertsona mailaz, kultur ikuspegi aberats eta zabalaz, erantzukizun zentzuaz.
Hutsune handia utzi du gure kulturgintzan.
Milesker Miren, eta ez adiorik.