Artikuluak

Sariaren azken edizioko txapela jantzi duen albuma adiskidetasunaren garrantziaz mintzo da, soinean jantziak dituen letretan eta ilustrazioetan. Aitziber Alonso irudigileak eta lehiaketako epaimahaiko kideak nabarmendu zuenez, lanak "oso kalitate oneko irudiak biltzen ditu". Izan ere, konposaketaren aldetik egindako lana eta prespektiba lantzeko erabili den moduak "asko aberasten du kontakizuna". Mikel Gurrutxagaren lumatik jaio diren hitzak Maite Gurrutxagak egindako irudiek sortzen duten doinu poetikoen erritmoan egiten dute dantza.

"Elkar ondo ulertzen dugu, niri oso gustatzen zait Mikelek lan egiteko duen modua; ondo moldatu ginen hasieratik", adierazi zuen Maite Gurrutxagak. "Gure izaerari leial izan gara eta horri esker hau guztia lortu ahal izan dugu", gehitu zuen.

2009ko Etxepare Sariko garaileek 6.000 euroko saria izan dute, beren ibilbidearekin aurrera egin dezaten -sariak Esther Lakastak, Nafarroako iparraldeko Euskara Mankomunitateko lehendakariak, eta Euskarabideko zuzendari Xabier Azanzak banatu zituzten-. Baina saria ez da bakarrik laguntza ekonomikora mugatuko, izan ere, urria aldera, lana Euskal Herriko kulturgintzara eginen du salto Pamiela Argitaletxearen eskutik. Gainera, Pello Elzaburu Pamielako arduradunak adierazi zuenez, Kalandraka argitaletxearekin batera elkarlanean, hiru hizkuntzatan argitaratuko da Gurrutxaga neba-arreben lana: gutxi gorabehera, 1.000-1.500 ale inguru jatorrizko hizkuntzan, euskaran, 3.000 ale gaztelaniaz eta 1.000 ale galegoz.

Oinarriak

Maite Gurrutxaga –irudigilea–

Mikel Gurrutxaga –idazlea–