Artikuluak

I. Berro. Berria (2009-11-04)

Ruben Ruizen (Gasteiz, 1973) Anekdotak obrari, «munduari eta bizitzari begirada poetikoa eskaintzen dion liburuari» eman diote Haur eta Gazte Literaturako Euskadi saria, Garbiñe Iztuetak, sail horretako epaimahaiburuak jakinarazi duenez. Pamielarekin kaleratutako liburuko pertsonaia nagusiak Ane du izena, eta orrialdeetan aurrera, anekdotak kontatuko ditu, «bizitzaren eta hizkuntzaren gaineko gogoeta ederrak». Izan ere, atzo hitz berri bat entzun zion atso bati Anek: anekdota. Asko gustatu zitzaion berba hori, akaso, esaten den aldiro bere izena esaten delako. Gaur jakin du zer esan nahi duen hitz horrek, eta jakin du hitz hori erabili beharrean pasadizo esan dezakeela. Baina Anek anekdota esatea nahiago du. Berari gertatutakoak idatzi egingo dituela erabaki du.

Aneren burutazio eta ateraldiak idazteko, «espioitza lana» egin duela aitortu du Ruizek. «Supermerkatuan, eskolan, plazan eta edozein tokitan nintzela, haurren arteko elkarrizketak entzuteko ohitura hartu nuen, esaten dituzten gauza askotatik ateratzen ahal baita idazteko gai bat». Helduek espero ez dituzten gogoetak egiten dituzte sarri askotan umeek, eta horrenbestez, irakurlea ustekabean harrapatuko duten egoerak eta hizketaldiak ageri dira Anekdotak liburuan.

30 kontakizun laburrek osatzen dute Ruizek berak «abaraska» gisa definituriko liburua. Banaka, batetik bestera salto eginez edota bata bestearen segidan leitu daitezke. Liburua bere osotasunean «errugbiko baloi baten botearen modukoa» dela dio Ruizek. «Futboleko baloi batek edo eskupilotako pilota batek zer bote emango duen badakigu; errugbiko batek nora egingo duen, ordea, ez dugu hain argi ikusten». Halakoxeak dira umeen ateraldiak, eta antzekoak Ruizen Anekdotak liburuko kontakizunak.

Halaxe uste dute epaimahaikideek ere. Iztuetak adierazi duenez, «Aneren ikuspuntuak baditu hainbat erpin: begirada aberatsa du, ikuspegi oso inozoa baina oso kontzientea».

Eider Eibarrek (Bilbo, 1980) egin ditu ilustrazioak.